Kur je pranë, gjithçka bëhet më e sigurt.🙏 Një mesazh për nënat e adoleshentëve

Të jesh nënë është një udhëtim i bukur por edhe i vështirë, i mbushur me gëzime të mëdha dhe sfida të padukshme. Shpesh dita fillon para se dielli të ngrihet dhe mbaron shumë pas orës së shtrirjes. Mes punës, përgjegjësive dhe detyrimeve të përditshme, gjërat më të thjeshta, një përqafim dashurie i ngrohtë, një bisedë e lirë dhe e qetë, një vështrim i ëmbël, një ledhatim dhe puthje në ballë duken të pamjaftueshme. Por pikërisht ato momente janë ato që fëmijët do t’i mbajnë gjithmonë në zemër. Prania jote ka një fuqi që shpesh nuk e kupton. Kur je pranë fëmijës, jo për ta kontrolluar por për ta dëgjuar, për ta kuptuar dhe për t’i qëndruar afër, ai gabon më pak. Jo sepse ka frikë por sepse ndihet i sigurt dhe një fëmijë që ndihet i sigurt, nuk ka nevojë të kërkojë forcë te dhuna. Kur je aty për ta dëgjuar, fëmija mëson të flasë për zemërimin përpara se ta kthejë në veprim. Mëson të kërkojë ndihmë përpara se të humbasë drejtimin. Është prania jote ajo që e ndihmon të dallojë të gabuarën nga e drejta. Fëmijët që ndihen të dëgjuar nuk kanë nevojë të provojnë veten përmes agresivitetit sepse ata nuk kanë nevojë të jenë të fortë me çdo kusht, sepse e dinë se kanë një vend ku janë të pranuar ashtu siç janë. Dhe kjo i mban larg rrugëve të rrezikshme, larg dhunës, larg vendimeve që lëndojnë. Të jesh pranë tyre nuk do të thotë të jesh perfekte por do të thotë të ndalosh, të dëgjosh dhe të mos ikësh kur fëmija gabon. Sepse pikërisht në ato momente ai ka më shumë nevojë për ty. Një fjalë e butë, një heshtje që dëgjon, një përqafim në kohën e duhur, bëjnë më shumë sesa çdo këshillë e ashpër.
Ndaj mos e nënvlerëso rolin tënd. Prania jote është mbrojtje, është udhërrëfyes dhe është forcë e heshtur. Ajo ndërton siguri sot dhe karakter nesër. Prandaj, edhe kur ndihesh e lodhur, edhe kur mendon se nuk po bën mjaftueshëm, kujto se prania jote është dritë në rrugën e fëmijës tënd. Të jesh pranë sot do të thotë ta mbrosh nesër dhe në këtë botë të zhurmshme e të pasigurt, dashuria që dëgjon është forma më e fortë e mbrojtjes që një nënë mund të japë.