A ndikon mjedisi ku jetojmë në shëndetin tonë më shumë sesa mendojmë?
A jemi mjaftueshëm të ndërgjegjshëm për rreziqet që na rrethojnë çdo ditë?
Çfarë roli kanë shkenca, profesionistët dhe media në mbrojtjen e shëndetit publik?Këto ishin pyetjet që përshkuan seminarin trajnues “Shëndeti mjedisor dhe ndikimi i tij në jetën e njeriut”, organizuar më 11 korrik nga Qendra e Kërkimit Shkencor për Shëndetin Publik, pranë Fakultetit të Shëndetit të Universitetit “Ismail Qemali” Vlorë. I zhvilluar në ambientet e Fakultetit të Shëndetit, seminari mblodhi pedagogë, profesionistë të fushës, studiues dhe studentë, duke u shndërruar në një platformë të rëndësishme shkencore për shkëmbimin e njohurive, përvojave dhe praktikave më të mira mbi një nga sfidat më të mëdha të shëndetit publik: ndikimin e mjedisit në jetën dhe mirëqenien e njeriut. Qendra e Kërkimit Shkencor për Shëndetin Publik, e drejtuar nga Prof. As. Dr. Fatjona Kamberi, ka si mision nxitjen e kërkimit shkencor, promovimin e inovacionit në shëndetin publik dhe organizimin e aktiviteteve akademike e trajnuese që kontribuojnë në zhvillimin profesional të specialistëve të fushës. Përmes konferencave, seminareve dhe projekteve kërkimore, qendra synon të ndërtojë ura bashkëpunimi mes universitetit, institucioneve dhe komunitetit, duke e vendosur shkencën në shërbim të shoqërisë. Edhe kjo veprimtari u konceptua dhe u realizua nga grupi i punës, të cilët ndërtuan një program që ndërthurte ekspertizën shkencore me rëndësinë e komunikimit publik. Qëllimi i seminarit ishte forcimi i kapaciteteve profesionale të pjesëmarrësve, përditësimi i njohurive mbi shëndetin mjedisor dhe nxitja e një qasjeje të integruar, ku kërkimi shkencor, edukimi dhe komunikimi bashkëpunojnë në funksion të mbrojtjes së shëndetit. Në referimet e tyre, PhD. Jerina Jaho, Prof. As. Dr. Fatjona Kamberi dhe Dr. Luçiano Balilaj trajtuan tema me interes të veçantë mbi ndikimin e faktorëve mjedisorë në shëndetin e njeriut, efektet e ndotjes, sfidat që sjellin ndryshimet klimatike, si dhe rëndësinë e politikave parandaluese dhe edukimit shëndetësor. Referimet u mbështetën në fakte shkencore dhe përvoja profesionale, duke ofruar një qasje bashkëkohore ndaj problematikave që prekin shëndetin publik. Një dimension i rëndësishëm i seminarit ishte komunikimi i rrezikut.
Marieta Mërkuri, përgjegjëse e Laboratorit Mediatik Universitar, referoi mbi temën “Ndërgjegjësimi publik për rreziqet shëndetësore mjedisore dhe roli i medias”, duke theksuar se media është një partner strategjik në përçimin e informacionit shkencor, në edukimin e qytetarëve dhe në ndërtimin e një kulture të përgjegjshme për mbrojtjen e shëndetit dhe mjedisit. Seminari u karakterizua nga një pjesëmarrje aktive dhe një atmosferë e hapur bashkëpunimi. Referimet u pasuan nga diskutime profesionale, pyetje, komente dhe një dialog i frytshëm mes referuesve dhe pjesëmarrësve, të cilët ndanë përvoja nga praktika e tyre dhe diskutuan mbi sfidat aktuale të shëndetit mjedisor. Ky bashkëveprim e shndërroi seminarin në një forum të vlefshëm reflektimi dhe shkëmbimi idesh, duke dëshmuar interesin në rritje për këtë fushë. Përmes organizimit të aktiviteteve të tilla, Qendra e Kërkimit Shkencor për Shëndetin Publik po konsolidon rolin e saj si një qendër që promovon kërkimin shkencor, edukimin profesional dhe bashkëpunimin ndërdisiplinor. Në të njëjtën kohë, partneriteti me Laboratorin Mediatik Universitar dëshmon se komunikimi i shkencës është një komponent thelbësor i shëndetit publik, pasi vetëm një qytetar i mirëinformuar mund të marrë vendime të përgjegjshme për shëndetin e tij dhe të komunitetit. Ky seminar nuk ishte vetëm një aktivitet akademik. Ai ishte një thirrje për ta parë shëndetin mjedisor si një përgjegjësi të përbashkët, ku universiteti, kërkimi shkencor, profesionistët dhe media bashkojnë forcat për të ndërtuar një shoqëri më të informuar, më të ndërgjegjshme dhe më të shëndetshme.
