Në kuadër të Javës së Shoqërisë Civile 2025, një nga mesazhet më të forta që duhet të dëgjohet me zë të lartë është pikërisht zëri i tokës, që në 17 qershor ngre alarmin global për shkretëtirëzimin dhe thatësirën. Në një botë ku një e treta e sipërfaqes tokësore është e ekspozuar ndaj degradimit, kjo datë nuk është thjesht simbolike, është një thirrje për veprim, ndërgjegjësim dhe përgjegjësi. Vlora, një qytet me pasuri të jashtëzakonshme natyrore dhe bregdetare, nuk është imune ndaj efekteve të degradimit të tokës veçanërisht në zonat rurale, kodrat e zhveshura dhe përdorimin e tepruar të burimeve. Prandaj, përballë shpyllëzimit, mbeturinave të pakontrolluara dhe mungesës së një strategjie të qartë për mbrojtjen e tokës dhe ujërave, fjalët duhet të shndërrohen në veprime. A do të rizgjohet ndërgjegjja qytetare? Sepse kur toka pushon së frymuari, gjithçka rrezikon të shuhet, prodhimi, ajri, natyra, shëndeti, jeta. Dita e 17 Qershorit është mundësi që edhe Vlora të tregojë se është qytet i gjallë, me zë dhe me ndjeshmëri. Të tregojë se qytetaria e vërtetë nuk qëndron vetëm në kujtesën e gurëve dhe historisë, por në kujdesin aktiv për të ardhmen.
